Har bir dasturchining o‘z yo‘li, o‘z hikoyasi bor. Mening ITga bo‘lgan qiziqishim maktab davrimdan boshlangan. Birinchi marta 9-sinfda Turbo Pascal 7.0 dasturida kod yozganimda, kod qanday ishlashini tushunishga harakat qilganman. O‘sha paytda hali bu sohaga jiddiy kirishish haqida o‘ylamagan bo‘lsam ham, qiziqishim aynan shu vaqtda boshlangan.
Universitet va dastlabki tajribalar
2019-yilgacha men Toshkent Axborot Texnologiyalari Universitetiga (TATU) kirish maqsadida tayyorgarlik ko‘rganman. Bu jarayonda fizika va matematikaga alohida e’tibor berganman. Universitetga kirganimdan so‘ng, dasturlash bilan jiddiy shug‘ullana boshladim.
Dastlab C++ va C++ Builder bilan ishlaganman, shunda dasturlashni amaliyotda qo‘llash imkoniyatini ko‘rganman. Biroq, bu dasturlash tillari menga yetarlicha qiziqarli tuyulmagan, shuning uchun boshqa yo‘nalishlarga ham qiziqish bildirganman.
Web dasturlashga kirib kelishim
2020-yilda web dasturlashni o‘rganishni boshladim. Bu davrda turli dasturlash tillarini sinab ko‘rdim: Java, Python, Go, PHP va boshqalar. Lekin eng mos keladigani JavaScript ekanligini angladim. Sababi, frontend va backend uchun ishlatish mumkinligi va imkoniyatlari kengligi menga juda yoqdi.
Ish tajribam va yo‘nalishimni aniqlash
-
2021-yil – Frontend dasturchi sifatida o‘z faoliyatimni boshladim. Shu bilan birga, backend yo‘nalishi ham meni qiziqtirgani uchun uni ham o‘rganishda davom etdim.
-
2022-yil – Fullstack dasturchi sifatida ishladim. Bu davrda Node.js texnologiyasini chuqurroq o‘rganishga kirishdim. Oldin JavaScript bilan ishlaganim sababli, backendda ham ushbu til bilan ishlash ancha oson bo‘ldi.
-
2023-yil – Men Mohirdev kompaniyasiga backend dasturchi sifatida qo‘shildim. Bu yerda yanada tajriba to‘pladim va backend yo‘nalishida yanada chuqurlashdim. Bu yerda millionlab foydalanuvchiga ega bo‘lgan loyihalar ustida ishlash tajribasiga ega bo‘ldim. Bunday yirik loyihalarda shkalalanish, optimizatsiya, yuqori yuklama (high load) va xavfsizlik kabi muhim jihatlarni hisobga olish talab etiladi. Ushbu tajriba menga real biznes loyihalarini samarali boshqarish va barqaror backend tizimlarini yaratish bo‘yicha katta bilim berdi va berib kelmoqda.
Xulosa
IT sohasiga kirishim qiziqish, sinab ko‘rish va tajriba orttirish bilan bog‘liq bo‘ldi. Har bir bosqichda yangi narsalarni o‘rganganman, qiyinchiliklarga duch kelganman, lekin oldinga intilishni to‘xtatmaganman. Hozir esa o‘rganganlarimni boshqalar bilan bo‘lishish, yangi loyihalar yaratish va IT sohasida o‘z hissamni qo‘shish niyatidaman.
Siz ham dasturlashga qiziqayotgan bo‘lsangiz, birinchi qadamni qo‘yishdan qo‘rqmang! Texnologiyalar doimo rivojlanib boradi, siz ham ular bilan birga o‘sishingiz mumkin!